Frétt

Jákvæður dómur fyrir Landsvaka í Hæstarétti

Þann 8. desember sl. staðfesti Hæstiréttur dóm héraðsdóms frá 6. janúar 2011, þar sem Landsvaki hafði verið sýknaður af 7,5 milljóna kröfu viðskiptavinar um skaðabætur vegna rýrnunar inneignar í fjárfestingarsjóðnum Peningabréfum Landsbankans.

Á sunnudegi, 5. október 2008, óskaði viðskiptavinur eftir innlausn allra hlutdeildarskírteina sinna í sjóðnum, en sjóðurinn var opinn til klukkan 15.30 föstudaginn 3. október. Að morgni mánudagsins 6. október 2008 tók stjórn Landsvaka ákvörðun um að fresta innlausnum í sjóðnum vegna sérstakra aðstæðna á markaði. Viðskiptavinurinn byggði málatilbúnað sinn á því að hann hefði gefið fyrirmæli um innlausn hlutdeildarskírteinanna áður en ákvörðun stjórnar Landsvaka um að fresta innlausn varð bindandi. Taldi Hæstiréttur að gildistaka ákvörðunar um frestun innlausnar hlutdeildarskírteina væri ekki bundin undanfarandi kynningu. Þá var ekki talið að sá dráttur hafi orðið á að ákvörðunin væri tilkynnt Fjármálaeftirlitinu og auglýst að það gæti haft áhrif á gildi hennar. Landsvaka hafi því ekki verið skylt að innleysa skírteinin 6. október 2008 á síðasta útgefna gengi sjóðsins frá 3. október. Samkvæmt þessu var staðfest niðurstaða héraðsdóms um sýknu Landsvaka (Dómur Hæstaréttar frá 8.12.2011 nr. 152/2011).